Foreslår nytt klimamål for Noreg

I 2025 skal alle land melde inn forsterka klimamål under Parisavtalen for perioden etter 2030.

I ein ny rapport bestilt av Klima- og miljødepartementet har Miljødirektoratet vurdert både ambisjonsnivå og moglege innretningar av målet som skal meldast inn til FN.

Dei tilrår at Noreg bør ha som mål å redusere utslepp av klimagassar i 2035 tilsvarande minst 80 prosent av nasjonale utslepp i 1990.

– Parisavtalen er tydeleg på at industrialiserte land må gå føre, og vi meiner at målet må vere i storleiksorden 80 prosent kutt i 2035 for at det skal kunne kan reknast som ein rettferdig del av globale reduksjonar, seier direktør Ellen Hambro i Miljødirektoratet i ei pressemelding.

Miljødirektoratet meiner også at Noregs ambisjonsnivå bør ta utgangspunkt i det lågaste temperaturnivået i Parisavtalen – å avgrense temperaturauken til 1,5 grader.