Forsking skal fornye havbruket

(NPK): Forskingsrådet har gitt 32 millionar kroner til seks forskingsprosjekt innanfor programmet «Fornyelse i Havbruk».

Nofima skal leie tre av dei seks prosjekta. Fellesnemnaren for dei seks prosjekta er fiskehelse. Eitt av prosjekta er knytt til sjukdomen francisellose hos torsk, medan dei to andre er forsking på laks.

– Eg vil gratulerer forskarane våre som har klart å få finansiering av desse viktige prosjekta. Dette er imponerande når vi veit at konkurransen er tøff og berre 21 søknader vart innvilga innanfor havbruk og marin forsking, seier administrerande direktør Øyvind Fylling-Jensen i Nofima.

Bente Torstensen, direktør for Akva-divisjonen i Nofima, minner om at god fiskehelse er avgjerande for berekraftig havbruk.

Dei tre forskarane i Nofima som skal leie prosjekta er Anne Kettunen, Binyam Dagnachew og Marta Bou Mira.

I desse prosjekta skal det forskast på forbetra motstand mot francisellose hos oppdrettstorsk, genetikken bak resistens mot patogene bakteriar og betydninga av ulike feittvev for fiskehelsa.

I ei pressemelding frå Forskingsrådet heiter det sjukdomen francisellose var ein av grunnane til at oppdrett av torsk ikkje lukkast tidleg på 2000-talet. No har interessa for torskeoppdrett teke seg opp igjen, og i prosjektet skal forskarane ved Nofima studere sjukdomen og undersøkje om det er mogleg å avle selektivt på fisk som er meir motstandsdyktig.

(©NPK)