Fryktar konkurransen frå aust

NPK-NTB: Norske bussaktørar meiner dei utanlandske må konkurrere på same vilkår som dei norske. Mange firma frå aust betaler verken minstelønn eller norske avgifter.
Teljingar gjort i regi av NHO Transport viser at det så langt i sommar er observert nesten 2.000 utanlandske turbussar i Noreg. Det er ein auke på om lag 6 prosent frå same periode i fjor, skriv Aftenposten.
Dei same bussane har vore registrerte fleire gonger i sommar, ifølgje NHO Transport. Ifølgje direktør John H. Stordrange i NHO Transport tilseier dette at bussane blir lengre i Noreg og tar fleire oppdrag internt enn tidlegare. Dei fleste er polske, estlandske eller litauiske.
– Det einaste desse selskapa kjøper i Noreg, er drivstoffet. Det seier seg sjølv at det gir dei ein betydeleg konkurransefordel, seier Stordrange.
I fjor viste Arbeidstilsynets kontrollar ein høg del brot på tariffavtalane, skriv avisa. Sjåførar skal ha minst 155,87 kroner i timen, men 77 prosent av dei kontrollerte, utanlandske sjåførane fekk ikkje utbetalt lønn i samsvar med dette. Statens vegvesens kontrollar har òg avdekt brot på kabotasjereglane.
– Det er heilt greitt med utanlandske sjåførar og bussar, men dei må konkurrere på like vilkår. Det er umogleg for eit norsk selskap å konkurrere på pris når dei driv slik, seier Gunnulf Hegna og Kjell Bjerke, sjåførar hos busselskapet H.M. Kristiansen Automobilbyrå, som er ein av dei største norske aktørane.