Får fiske meir kongekrabbe

(NPK-NTB): Regjeringa aukar kongekrabbekvoten. Frå neste år blir totalkvoten for hannkrabbar fastsett til 2.375 tonn, i tråd med tilrådingar frå Havforskingsinstituttet.

– Vi skattlegg kongekrabben på eit høgt nivå, men innanfor berekraftige rammer. Dette er i tråd med forvaltningsmålet om å avgrense spreiinga av kongekrabbe samtidig som vi skal ha ein lønnsam fangst, seier fiskeri- og havminister Bjørnar Skjæran (Ap).

Frå neste år kan det fangast 530 tonn meir hannkrabbar i Noreg enn i 2022. Kvoten gjeld for det kvoteregulerte området aust for 26 grader Aust i Finnmark.

– Kongekrabbe er eit produkt som oppnår svært høg pris i marknaden, og auka fangst av kongekrabbe vil bidra til meir verdiskaping i nord, legg Skjæran til.

Kvoten for hokrabbar er også i 2023 sett til 120 tonn, og minstemålet på 130 millimeter skal-lengd for både hannkrabbar og hokrabbar blir vidareførte.

(©NPK)