Får millionbot for dårleg fiskevelferd

(NPK-NTB): Mattilsynet gir 1,7 millionar i gebyr til Salmar for dårleg dyrevelferd. Tilsynet meiner Salmar har lagt meir vekt på økonomi enn dyrevelferd.

Bakgrunnen for rekordgebyret er eit ikkje varsla tilsyn ved Salmars anlegg Hjortøya på trøndelagskysten i april, skriv NRK.

Her fann inspektørane store mengder død oppdrettslaks og fisk som var skadd av såkalla vintersår. Dette oppstår ofte etter at laksen blir utsett for avlusing.

– I denne saka er vår vurdering at dei har lagt for stor vekt på å redusere økonomiske tap og ikkje vurderte store, opne sår på mange fisk i forhold til fiskevelferda, skriv Mattilsynet i vedtaket.

Salmar seier dei er sterkt usamd i avgjerda, men vil ikkje klage på avgjerda.

– Ut frå ei samla vurdering vedtok Salmar å ikkje slakte ut all fisk i merden, noko som ville medført avliving av mykje fisk som ikkje var ramma av vintersår. Salmar konstaterer at Mattilsynet i ettertid har vurdert dette annleis i denne saka. Salmar vel likevel å la gebyret bli ståande utan å klage på dette, skriv selskapet i ei pressemelding.

(©NPK)