Millionbot for opphogging av skip

(NPK-NTB): Eit Stavanger-basert selskap har vedteke eit førelegg på åtte millionar kroner for brot på forureiningslova i samband med ulovleg opphogging av to skip i India.

Skipa vart hogne opp på ei strand i Alang i India i perioden 2018 til 2020, skriv Økokrim i ei pressemelding.

Skipa vart køyrde opp på stranda for eiga maskin før dei vart hogne opp i tidvassona, ein metode som blir kalla beaching. Dette blir rekna som eit stort internasjonalt miljøproblem og er ulovleg i samsvar med EUs regelverk, som Noreg er omfatta av.

– Norskopererte skip skal ikkje sendast frå Nordsjøen til skraping i India. Økokrim ser alvorleg på at norske aktørar eksporterer avfalls- og miljøutfordringar til utviklingsland med langt svakare miljølovgiving enn Noreg. Noreg er dessutan ein av dei leiande sjøfartsnasjonane i verda, og har eit spesielt ansvar for å forhindre beaching av skipa våre, seier politiadvokat Maria Bache Dahl i Økokrim.

Millionbota vart først ikkje vedteken av selskapet, og saka var på veg mot tingretten med rettssak planlagd i januar. Men det blir ikkje noko av no ettersom selskapet har snudd og godteke bota. Selskapet har presisert at dei ikkje erkjenner straffskuld sjølv om dei har vedteke førelegget.

(©NPK)