Færre barn lever i låginntektsfamiliar

(NPK-NTB): Talet på barn som tilhøyrde eit hushald med vedvarande låge hushaldsinntekter i 2022, var det lågaste sidan 2016.

For andre året på rad vart både talet og andelen redusert, viser Statistisk sentralbyrås inntekts- og formuesstatistikk for hushald.

Det skjer sjølv om inntekta til norske hushald sokk med 1,4 prosent, og andelen og talet på personar med årleg låg inntekt auka svakt.

I perioden 2020 til 2022 var det 102.600 barn, eller 10,6 prosent av alle barn under 18 år, som tilhøyrde eit hushald med vedvarande låg inntekt.

Det er ein nedgang på 0,7 prosentpoeng, tilsvarande 8100 barn, samanlikna med perioden 2019 til 2021.

Før denne nedgangen var det ein lang periode med til dels kraftig auke, ifølgje SSB, der toppunktet vart nådd i 2018 til 2020. Då var det 115.000 barn som tilhøyrde familiar med låg inntekt, ein andel på 11,7 prosent.

(©NPK)