Færre fullfører bachelor på tre år

(NPK-NTB): Færre studentar enn før fullfører bachelorutdanninga på normert tid. Berre 52,2 prosent kjem i mål etter tre år, viser ferske tal.

For første gong på ti år er det no færre som gjennomfører treårige bachelorgrader på normert tid, skriv Khrono.

Det går fram av tilstandsrapporten for høgare utdanning i 2024.

For dei statlege institusjonane er nedgangen frå 53,3 til 52,1 prosent når ein samanliknar kullet teke opp i 2018 med kullet teke opp i 2020, viser rapporten.

Nedgangen blir forklart med at 2020-kullet var det første kullet som byrja på utdanninga si under koronapandemien.

– Særleg mange søkte seg til høgare utdanning desse åra på grunn av manglande alternativ, og det kan tenkjast at studentar som elles ikkje ville søkte høgare utdanning, hadde lågare motivasjon, heiter det i rapporten.

Leiar Kaja Ingdal Hovdenak i Norsk studentorganisasjon (NSO) er bekymra for tala. Ho meiner det er mange grunnar til at såpass få fullfører studia sine.

– Vi har ein lang veg å gå for å auke fullføringsgrada og redusere fråfallet blant oss. Slik vår økonomiske situasjon er i dag, så er vi som studentar heilt avhengige av å jobbe for å få endane til å møtast, seier ho til Khrono.

(©NPK)