Gjelda til folk veks raskare

(NPK-NTB): Gjelda til norske hushald auka med 4,4 prosent frå september i fjor til same periode i år. Det er raskare enn i august då gjeldsveksten var 4,2 prosent.

Gjelda til kommunane aukar mykje raskare enn hos hushalda, men er likevel markant lågare i september enn i august, med ein årsvekst på 6,9 prosent, viser tal frå Statistisk sentralbyrå (SSB). I august låg han på 8,3 prosent.

Også gjelda til ikkje-finansielle føretak veks saktare i september enn i august – 1,7 prosent mot 2 prosent.

Til saman gjer dette at innanlandsgjelda – som omfattar desse tre gruppene – hadde ein årsvekst på 3,8 prosent i september, ifølgje kredittindikatoren K2. I dei tolv månaden fram til august var gjeldsveksten på 4 prosent.

Sjeføkonom Kyrre Knudsen i SpareBank 1 Sør-Noreg synest gjeldsveksten i hushalda er «kjempeinteressant» og meiner det speglar at økonomien til folk er bra. Samtidig synest han gjeldsveksten til bedriftene er oppsiktsvekkjande låg.

– Vi hadde tenkt at rentenedgangen skulle bidra til noko høgare gjeldsvekst i bedriftene. Det betyr at det er andre ting som gjer at dei er varsame med investeringar, skriv han i ein e-post til NTB. Han trekkjer fram kraftig auka kostnader, uvisse rundt teknologisk utvikling og geopolitiske spenningar i verda.

(©NPK)