Har gjort første skredsikring på Trollstigen

(NPK-NTB): Første del av skredsikringsarbeidet av Trollstigen er gjennomført. Neste del av arbeidet er venta å vere i gang i september.

Arbeidet med å sikre ei avskjeringsgrøft langs den nasjonale turistvegen er fullført, opplyser Møre og Romsdal fylkeskommune på nettsidene sine.

Neste del av arbeidet er fjellrensk- og sikringsarbeid i fjellsida Kjelstadlinja. Tilbodsfristen for entreprenørar er denne veka, og arbeidet er forventa å vere i gang i september.

Fylkeskommunen har som mål å kunne opne Trollstigen til turistsesongen i 2025.

Turistvegen til Trollstigen er stengd på grunn av rasfare. Regjeringa har løyvd 40 millionar kroner til å utbetre vegen slik at han kan opne igjen.

Kostnadene er berekna til 50 millionar kroner, og fylkeskommunen tek dei resterande 10 millionane.

(©NTB)