NPK-NTB: To rundar med forsterka koronatiltak i desember gjorde at hotellinntektene gjekk kraftig ned. – Tragisk for ein svært hardt prøvd bransje, seier ein rådgivar.
Ifølgje Dagens Næringsliv viser tala frå Benchmarking Alliance at desember starta bra – etter at fleire byar hadde gode månader i oktober og november. Men så kom nye tiltak, inkludert skjenkestopp.
Oslo-hotella hadde ifølgje oversikta ei losjiinntekt per tilgjengelege rom (revpar) som var over 41 prosent lågare enn i desember 2019. For Bodø var nedgangen 39 prosent, noko som truleg kjem av auka kapasitet sidan pandemien starta. Det var òg nedgang i Tromsø (29 prosent), Bergen (23 prosent), Trondheim (15 prosent), Stavanger (7,5 prosent) og Gardermoen (6 prosent).
– Utviklinga i desember er rett og slett tragisk for ein svært hardt prøvd bransje, seier Peter Wiederstrøm, rådgivar i Wiederstrøm Hotel Consulting, som har analysert tala.
– Eg tør ikkje tenkje på korleis det er for hotelldrivarar å stadig gire opp aktiviteten med varebestillingar, vaktlister og bestillingar for så å trappe dramatisk ned etter smitteutvikling og tiltaka til styresmaktene. Det er ei nesten umogleg øving, seier han.
Publisert: 19.01.2022 07:43
Sist oppdatert: 19.01.2022 07:45
