Høgare bøter etter smitteutbrot

Kapteinen blir også idømd sakskostnader på 10.000 kroner. Dommen frå Nord-Troms og Senja tingrett fall tysdag.

Dei to var opphavleg gitt bøter på 30.000 og 40.000 kroner som dei ikkje vedtok. Dermed hamna saka i retten.

Bøtene vart gitt for manglande varsling til norske styresmakter. Skipslegen vart i tillegg bøtelagd for manglar ved yrkesutøvinga som helsepersonell.

I dommen frå tingretten tysdag blir det fastslått at kapteinen ikkje opptredde «slik ein kyndig og omtenksam person ville gjort i ein tilsvarande situasjon, og unnlét med dette å overhalde varslingsplikten», noko som var aktlaust.

For skipslegens del meiner tingretten at det er heva over alle rimeleg tvil at han mistenkte koronasmitte om bord på skipet, og at han dermed hadde varslingsplikt.

386 personar vart sette i karantene og 71 vart smitta i utbrotet på Hurtigrutens MS Roald Amundsen i juli 2020. Hurtigruten har tidlegare vedteke ei bot på éin million kroner for brot på skipstryggingslova og smittevernlova.

Skipslegens forsvarar, advokat Per Zimmer, seier til NTB at klienten hans er skuffa over dommen.

– Den tiltalte handla ut frå den kunnskapen han hadde. Å tenkje på covid-19 som ei moglegheit, er ikkje det same som å mistenkje smitte. Den tiltalte vart dessutan halde fullstendig utanfor dialogen som sentrale personar i Hurtigruten hadde med helsetenesta på land, seier han til NTB.

– Vi vil no saman vurdere vegen vidare og om dommen skal ankast, seier Zimmer.

Kapteinens forsvarar, advokat Benedicte Sunde Jamth, seier klienten hennar er skuffa og meiner tingretten har komme til feil resultat.

– Vi må gå gjennom heile dommen nøye først, og vil vurdere ein anke, seier ho til NTB.