Høgaste lønnsvekst på 20 år

(NPK-NTB): Den gjennomsnittlege månadslønna auka med 6 prosent frå november 2022 til november i fjor. Det er den høgaste veksten i månadslønn på over 20 år.

I november 2023 var ei gjennomsnittleg månadslønn på 56.360 kroner, ifølgje ferske tal frå Statistisk sentralbyrå (SSB). Det svarer til ein auke på 6 prosent, eller 3.200 kroner, frå november året før.

Auken er den høgaste lønnsveksten som er målt for tilsvarande periodar sidan 2002. Til samanlikning var lønnsveksten frå november 2021 til november 2022 på 4,6 prosent.

– Veksten i månadslønn blir påverka særleg av at lønnsoppgjera i 2023 var betre enn tidlegare år og kan sjåast i samanheng med den sterke prisveksten dei siste åra, seier spesialrådgivar Håkon Grini i SSB.

I løpet av 2023 var det ein jamn, men svak vekst i arbeidsløysa. Det var også ein auke i talet på ledige stillingar, noko som tyder på at etterspurnaden etter arbeidskraft er høg.

Konfliktar i mellom anna undervisnings- og barnehagesektoren bidrog til at lønnsoppgjer for 2022 ikkje har vorte fanga opp i lønnsstatistikken før året etter. Derfor vart veksten i månadslønn frå november 2022 til 2023 noko høgare enn han elles ville vore.

Lønnsveksten var høg i alle sektorar, men høgast i stats- og kommuneforvaltningar med ein auke på 6,7 prosent i begge sektorar.

Frå november 2022 til november 2023 vart lønnsgapet mellom kvinner og menn mindre som følgje av at kvinner har hatt sterkare lønnsvekst i perioden. Menn hadde ein vekst på 5,7 prosent, medan månadslønna til kvinner auka med 6,6 prosent i same periode.

Trenden ein har sett over dei siste 25 åra, der dei høgast lønte jobbane har hatt betre lønnsutvikling enn lågare lønte jobbar, står i kontrast til utviklinga i 2023.

– Dei 10 prosent høgast lønte hadde den svakaste lønnsveksten i 2023 på 5 prosent, og dermed har lønnsulikskapen vorte mindre, forklarer Grini.

Dei førebelse tala frå SSB viser at årslønna auka med 5,4 prosent i 2023.

(©NPK)