Høgaste prisvekst sidan 1980-talet

(NPK-NTB): Konsumprisindeksen (KPI) steig 7,5 prosent dei siste tolv månadene. Auken er den høgaste tolvmånadersveksten målt i oktober sidan 1987, ifølgje SSB.

Tala viser at matvareprisane var den viktigaste forklaringa til den høge veksten dei siste tolv månader, skriv Statistisk sentralbyrå ( SSB ).

Frå september til oktober 2022 steig KPI 0,3 prosent og var 7,5 prosent høgare enn for eitt år sidan.

– Prisveksten held fram med å stige frå allereie svært høge nivå. Det er spesielt prisutviklinga på straum, mat og drivstoff som bidreg til at prisveksten blir løfta til 7,5 prosent i oktober, seier seksjonssjef Espen Kristiansen i SSB.

Prisane på matvarer og alkoholfrie drikkevarer gjekk ned 0,2 prosent frå september til oktober, men har auka kraftig det siste året.

Frå oktober i fjor til oktober i år har prisane for denne gruppa auka 13,1 prosent, som er ein auke frå tolvmånadersendringa på 12,1 prosent i september.