Høgre etter møtet om skatteforlik: – Sprikjande staur

(NPK-NTB): Jens Stoltenberg samla tysdag stortingspartia til det han kallar «eit godt møte» om eit mogleg skatteforlik. – Viste liten vilje til forhandlingar, seier Høgre.

– Sjølv om det openbert er usemje, og at skatt framleis kjem til å vere eit stridstema i norsk politikk, så meiner eg det var eit godt møte med vilje til å sjå på vegen vidare for å få til eit forlik, seier Stoltenberg til Dagens Næringsliv etter møtet.

Planen hans er at ein skattekommisjon blir sett ned innan kort tid og leverer innstillinga si innan neste sommar. Deretter skal regjeringa lage eit forslag til eit nytt skattesystem som blir sendt over Stortinget for forhandlingar.

– Dette kan startast og gjennomførast frå og med budsjettåret 2028, seier Stoltenberg.

Høgre, Frp, KrF og Venstre avviste tidlegare i oktober ideen om ein skattekommisjon og ville heller ha eit hurtigarbeidande utval.

Ifølgje Stoltenberg var alle partia i møtet tysdag positive til å diskutere mandat og samansetning av ein kommisjon.

Finanspolitisk talsperson for Høgre Nikolai Astrup seier at avstanden mellom dei ni partia er stor.

– Det er ingen tvil om at det er sprikjande staur. Det vart ganske klart i møtet. Partia har veldig ulikt utgangspunkt for dette arbeidet, og kva dei skal fram til. Finansministeren viste liten vilje til å gå ut i forhandlingar, og ønskjer seg ein kommisjon. Det er privilegiet til regjeringa å setje ned ein kommisjon, seier han.

(©NPK)