Ingen tiltak førebels gode nok mot pukkellaks

(NPK): Neste sommar kjem den uønskte pukkellaksen tilbake til norske elvar i tusenvis. Nokre av Noregs største lakseelvar står likevel utan beskyttelse.

Pukkellaksen invaderte Finnmarks elvar i store mengder i fjor. Arten kjem annakvart år, så dette har vore ein roleg sommar i år, men neste sommar kan det smelle for alvor , skriv NRK.

– Vi har ei formidabel oppgåve framfor oss for å stille førebudd til neste år. Det er ingen tvil om at vi jobbar under eit sterkt tidspress, seier Eirik Frøiland. Han er fiskeforvaltar og leier Miljødirektoratets nasjonale kompetansegruppe for pukkellaks.

I første omgang blir innsatsen konsentrert om Aust-Finnmark, der problemet har vore størst. Men første fase inkluderer ikkje den svært viktige Tanaelva fordi ingen har funne ei løysing som passar.

– Jo større elva er, jo større er utfordringa. Den fella vi har her i Vestre Jakobselv, har avgrensingane sine. Ifølgje råda vi har fått, vil ho ikkje fungere i ei så stor elv som Tana, seier Frøiland.

I fjor deltok lokale elveforpaktarar og frivillige turistar i dugnad i kampen mot pukkellaksen i Vestre Jakobselv. Det går ikkje eitt år til, fastslår May-Britt Dervo, nestleiar i Vestre Jakobselv jeger- og fiskarforeining.

Sist kom det minst 10.000 pukkellaksar i denne elva. Neste år kan det bli langt over ti gonger så mykje.

Kampen som no står i Aust-Finnmark, kan ha noko å seie langt ut over Noregs grenser.

– I store elvar som Tana kan det vere snakk om millionar av pukkellaksar viss det blir sleppt heilt fritt. Det vil då spreie seg vidare i Noreg og potensielt mange land i Europa, seier Frøiland.

(©NPK)