Jamnt mellom blokkene

NPK-NTB: Ny nasjonal måling for juli viser tilnærma dødt løp mellom dei politiske blokkene, men med eit raudgrønt fleirtal på 86 mandat når Raudt og MDG blir inkludert.

50 dagar før valet får Arbeidarpartiet 25,6 prosent oppslutning, ned 0,3 prosentpoeng frå juni, medan Frp aukar med 0,4 prosentpoeng til 23,8 prosent. Høgre styrkjer seg også med 1,3 prosentpoeng frå oppslutninga på 15,3 prosent i juni til 16,6 prosent i juli.

Det viser ei ny måling utført av Sentio Research i perioden 10. til 18. juli. Målinga er basert på intervju med 1000 personar.

Rundt 20 prosent av dei spurde er framleis usikre på kven dei vil stemme på.

Utjamningsmandata i målinga fordeler seg på fleire parti. Raudt får mandat i mellom anna Oslo, Rogaland og Finnmark, medan SV sikrar seg utjamningsplassar i fylke som Akershus, Nordland og Troms. Venstre får mandat i Hordaland, Sør-Trøndelag, Sogn og Fjordane og Aust-Agder, medan Senterpartiet får i Buskerud, Østfold og Møre og Romsdal.

Oppslutninga til partia er som følgjer (endring frå juni i parentes): Ap 25,6 (-0,3), Frp 23,8 (+0,4), Høgre 16,6 (+1,3), KrF 3,0 (-0,9), Raudt 6,0 (-0,7), Sp 5,8 (+0,8), SV 7,4 (+0,5), Venstre 4,0 (+0,2), MDG 3,8 (-0,6), Andre 4,0 (-0,7).

Feilmarginane i målinga varierer frå 1,2 til 3,1 prosentpoeng.