Kallar tilbake Jubelsalami

NPK-NTB: Fire parti Jubelsalami og Jubelsalami med pepar blir kalla tilbake etter at det har vorte påvist Salmonella i ei miljøprøve frå lokala til ein råvareleverandør.

Samtidig som produkta blir trekte tilbake, har Grilstad ikkje gjort funn av salmonellabakteriar i sine eigne produkt, råvarer eller produksjonslokale, kjem det fram i ei pressemelding.

– Det har ikkje vorte påvist Salmonella hos Grilstad, verken i produksjonslokala, råvarene eller i dei ferdige produkta. Etter dialog med Mattilsynet, og for å unngå uvisse blant forbrukarane og kundane våre, trekkjer vi desse partia frå marknaden, seier direktør Ståle Gausen for innkjøp og næringspolitikk i Grilstad.

Grilstad trekkjer òg tilbake eit mindre parti med Grilstad spekeskalker, fordi det kan innehalde avskjer frå dei ramma partia med Jubelsalami.