Kanonmåling for Frp

NPK-NTB: Kvar tredje veljar i Møre og Romsdal hadde plukka ut ei Framstegsparti-stemme i valavlukket om valet var i dag.

– Eg kan ikkje hugse at vi nokon gong har målt Frp så høgt i eit enkelt fylke. Eg trur dette må vere i nærleiken av ein rekord, seier dagleg leiar Thore Gaard Olaussen i Respons Analyse til Sunnmørsposten.

Med 34,2 prosent oppslutning i Respons' måling gjennomført for Romsdals Budstikke, Tidens Krav og Sunnmørsposten ville Frp stukke av med tre av sju mandat frå Møre og Romsdal.

– Dette er voldsomt, men vi skal stå på heilt fram til valet, seier partileiar Sylvi Listhaug til Sunnmørsposten.

Ho forklarer framgangen i heimfylket med tre saker.

– Vi ser ei regjering som fører ein ustabil nærings- og skattepolitikk. Vi har Helseplattforma som rammar folk i fylket sitt helsetilbod, og vi har ein samferdselspolitikk der vi vil prioritere dei viktigaste prosjekta og skrote Møreaksen.

I stortingsvalet for fire år sidan enda partiet med 22,1 prosent av stemmene i Møre og Romsdal, og dermed ligg dei an til ein auke på 12 prosentpoeng.

Arbeidarpartiet blir proklamert som målingas andre vinnar. Dei får ei oppslutning på 22,4 prosent i fylket, noko som er litt over to prosentpoeng meir enn då dei vann valet for snart fire år sidan.

Feilmarginen i meiningsmålinga er på pluss/minus 2 til 3,5 prosentpoeng. Målinga er gjennomført i perioden 17. til 24. februar, og 800 personar er intervjua over telefon.