Klimaendringar kan jage skreien vekk frå Sunnmøre

(NPK): Forskarar er usikre på om det vil kome skrei til Ålesund i år, etter at mengda av skrei sør for Lofoten har gått kraftig ned dei siste åra.

I fjor fann forskarane for første gong ikkje ein einaste skrei i Borgundfjorden ved Ålesund, noko som er svært uvanleg, skriv Havforskingsinstituttet.

Seniorforskar Kjell Harald Nedreaas ved Havforskingsinstituttet forklarar at nedgangen kan skuldast fleire faktorar:

– Er bestanden stor, vil den naturleg spreie seg over eit større område for å gyte. Men viss ein bestand ikkje får nok påfyll av unge individ, vil den nødvendigvis bli mindre talrik etter kvart.

Temperatur spelar også ei viktig rolle. Skreien føretrekker ein gytetemperatur på 4-6°C, og med global oppvarming kan ein vente mindre skrei i sørlege farvatn.

– Enkelt forklart vandrar skreien nordover når det blir varmare og sørover når det blir kaldare, seier Nedreaas.

For å motverke nedgangen har det sidan 2009 vore innført restriksjonar på torskefisket i Borgundfjorden. Trass i dette har ikkje bestanden tatt seg opp. Havforskingsinstituttet har no tilrådd nye reguleringar, inkludert auka minstemål på torsken og utvida verneperiode.

(©NPK)