Kokken Torje er Årets lærling

Torje Johan Torvik frå Herøy overtydde sterkt på fagprøven i kokkefaget og er kåra til Årets lærling i Møre og Romsdal.

Det kjem fram i ei melding frå Møre og Romsdal fylkeskommune. 

Torvik synest det både er stas og ei stor ære. 

-  Eg er ekstremt takksam og overraska over denne utmerkinga! Det er veldig gøy å sjå resultat av arbeidet som har blitt lagt ned under læretida, seier han om kåringa.

Den nyslåtte koken vaks opp i Herøy og starta på kokkefaget på Herøy vidaregåande.

Utmerkinga inneberer ei pengepremie på 10 000 kroner, diplom og blomster. Tildelinga vil skje på restaurant Bro Ålesund, der Torvik har gjennomført læretida - og i dag er fast tilsett som kokk.

Herøyværingen blei nominert til prisen av Opplæringskontoret for hotell, restaurant- og matfag Møre og Romsdal og prøvenemnda. 

Opplæringskontoret nemner i nomineringa si at resultatet på fagprøva haldt eit svært høgt nivå samtidig som det viser særdeles god fagkunnskap. Dei omtalar han som ein svært dedikert og profesjonell fagmann allereie, trass i ung alder og ferskt fagbrev, ifølgje meldinga. 

I eit intervju med NPK i fjor fortalde han om vegen til kokkeyrke, og sitt syn på utfordringane med å rekruttere fleire med fagbrev. 

– Mange trur det berre går ut på å stå og lage mat ein heil dag, men det er mykje meir enn det, fortalde han mellom anna.