Kraftig auke i talet på sysselsette

(NPK-NTB): Talet på sysselsette gjekk opp med 43.000 personar frå mars til juni. I same periode heldt arbeidsløysa seg stabil, viser tal frå Arbeidskraftundersøkinga.

– Auken i talet på sysselsette må sjåast i samanheng med at talet på ufrivillig permitterte har gått ned i same periode, seier seksjonssjef Tonje Køber i SSB.

Talet på sysselsette var i juni tilbake på omtrent same nivå som før koronakrisa starta i mars 2020 – òg når ein måler det i prosent av befolkninga.

Frå mars til juni var det berre små endringar i arbeidsløysa. Dei 138.000 arbeidslause i juni utgjorde 4,8 prosent av arbeidsstyrken, som er omtrent same nivå som i dei førre månadene i 2021.

Arbeidsløysa auka frå eit nivå på under 4 prosent før innføringa av koronatiltaka i mars 2020 til eit nivå på over 5 prosent i fjor haust.

(©NPK)