Kraftig auke med fagskulestudentar

(NPK-NTB): For første gong er det over 30.000 fagskulestudentar i Noreg. Talet har dobla seg sidan 2016.

– Dette er ein stor milepæl for høgare yrkesfagleg utdanning i Noreg. På få år har vi dobla talet på studentar ved fagskulane. Her blir det utdanna kandidatar som vi har stort behov for, både i næringsliv og offentleg sektor. Det at vi no har over 30.000 studentar under utdanning på fagskulane, er ein stor ressurs for heile samfunnet, seier forskings- og høgare utdanningsminister Sandra Borch (Sp)

Dei siste tre åra er det løyvd midlar til totalt 2600 nye studieplassar, og regjeringa har foreslått ytterlegare 500 nye plassar i budsjettet sitt.

– For regjeringa er dette eit av våre viktigaste mål: Uansett sosial eller kulturell bakgrunn, same kvar i landet du bur, uansett økonomiske føresetnader – alle skal ha høve til å utvikle seg, bli utfordra og bli kvalifisert, seier Borch.

(©NPK)