Krev 13,3 milliardar etter fregatt-forlis

NPK-NTB: Det spanske verftet Navantia får krav på 13,3 milliardar kroner i erstatning for konstruksjonsfeil på fregatten KNM Helge Ingstad, som kolliderte i 2018.

Forsvarsdepartementets beløp er basert på prisen av ny fregatt, hevinga av skipet, og ei rekke frådrag, skriv Teknisk Ukeblad.

I august 2024 blei det kjent at Forsvarsdepartementet saksøker Navantia. Det spanske verftet bygde dei fem fregattane i Fridtjof Nansen-klassen, også KNM Helge Ingstad, som kolliderte med eit tankskip og sokk utanfor Øygarden natt til 8. november 2018.

Fregatten fekk ei stor flenge i skroget, og ei veke etter ulykka sokk han. I mars 2019 blei han heva, og vraket blei seinare hogge opp.

Forsvarsdepartementet meiner ikkje at Navantia har noko ansvar for sjølve kollisjonen eller skadane fartøyet fekk, men det er også alt partane er einige om. Frå norsk hald blir det oppført at konstruksjonen til fregatten bidrog til at han gjekk tapt. Det blir mellom anna peika på hole propellakslingar, som gjorde at vatn kunne strøyme mellom vasstette seksjonar i skipet. Tilsvarande spanske fregattar bygd av Navantia har ein litt annan, vasstett konstruksjon.

Verftet meiner på si side at problemstillinga blei avdekt før ulykka, men at dette ikkje blei følgt opp.

Advokat Ole Kristian Rigland hos Regjeringsadvokaten seier målet framleis er å bli einige gjennom mekling. Dersom det ikkje lèt seg gjere, begynner rettssaka 23. september.