Krev vindturbin-riving

NPK-NTB: Folkerørsla Motvind Noreg krev at dei to største vindkraftanlegga i landet blir rivne, etter at samane vann vindkraftsaka om Fosen i Trøndelag i Høgsterett.

– Det er ulovleg bygging, kort og godt. Dei hadde ikkje heimel til å byggje, seier Torbjørn Lindseth, styremedlem i Motvind Noreg, til NRK.

Dommen frå Høgsterett måndag morgon gjeld dei to vindkraftanlegga Storheia og Roan, som til saman har 151 vindturbinar. Høgsterett kom fram til at vedtaket om konsesjon til vindkraftutbygging på Fosen i Trøndelag er ugyldig, då utbygginga krenkjer retten reindriftssamane har til kulturutøving.

Advokat Eirik Brønner, som representerte reindriftssamane i retten, seier til NRK at han deler synet til Motvind Noreg.

– Vi ventar no i første omgang på kva Fosen Vind og Olje- og energidepartementet vil gjere med dette, seier han.

Olje- og energidepartementet skriv i ein e-post til NRK at departementet har merka seg avgjerda frå Høgsterett, og at dommen utløyser behov for ei avklaring av situasjonen.