Kvartalstal klare frå Røkke-selskap

Rapportane frå andre kvartal og første halvår frå dei to Røkke-selskapa Aker Horizons og Aker Solutions er klare.

Fall i andre kvartal for Aker Horizons

Kjell Inge Røkkes grøne investeringsselskap Aker Horizons fekk eit fall i eigenkapitalen i andre kvartal.

Aker Horizons' verdijusterte eigenkapital enda i andre kvartal på 11,1 milliardar kroner, kjem det fram av ein fersk kvartalsrapport torsdag.

Det er ein nedgang frå første kvartal. Då var eigenkapitalen på 15,8 milliardar kroner.

Aker Horizons fungerer som ein samlestad for grøne investeringar i Aker-verda. Sidan selskapet gjekk på børs i februar 2021, har det vore på ein meir eller mindre samanhengande kursnedtur, skriv DN.

Selskapet hadde ei kontantbehaldning på 3,6 milliardar kroner og ein kredittfasilitet på 500 millionar euro, kjem det fram av børsmeldinga.

Sistnemnde svarer omtrent til 5,7 milliardar kroner etter dagens kurs.

Det er Kjell Inge Røkkes Aker Capital som er største eigar i Aker Horizons, med 67,2 prosent av aksjane.

Godt kvartal for Aker Solutions

Kjell Inge Røkkes Aker Solutions auka inntektene med nær 4 milliardar kroner i andre kvartal samanlikna med same kvartal i fjor.

Selskapet hadde inntekter på 14,2 milliardar kroner og enda med eit resultat før skatt på 732 millionar kroner i første kvartal, skriv selskapet i ei pressemelding torsdag morgon.

Det er opp frå høvesvis 10,6 milliardar og 420 millionar kroner i tilsvarande kvartal i fjor, skriv Finansavisen.

Driftsresultatet vart på 1,09 milliardar kroner, opp frå 653 millionar kroner i same periode i fjor.

Resultatet etter skatt enda på 539 millionar kroner.

Aker Solutions er ein del av Aker-konsernet og leverer teknologiprodukt og ingeniørtenester til prosjektering, bygging, drift og vedlikehald av anlegg innan mellom anna olje- og gassbransjen.

(©NPK)