Laber byggeaktivitet

NPK-NTB: Ikkje sidan 1993 har det vorte gitt så få byggjeløyve til bustader som i 2024.

I fjor vart det gitt igangsetjingsløyve til 18.679 bustader. Det er 18 prosent færre enn i 2023 og heile 37 prosent færre enn i 2022.

Dermed er dette det lågaste talet på byggjeløyve på 30 år, melder Statistisk sentralbyrå (SSB).

Nedgangen var størst i Telemark, Agder og Finnmark. Desse fylka hadde likevel ikkje same fall i 2023 som resten av landet.

Talet på fullførte bustader har også gått ned. Det vart ferdigstilt 24.032 bustader i fjor. Det er ein nedgang på 14 prosent frå året før og det lågaste talet sidan 2011, ifølgje byrået.

Også bygginga av fritidsbustader går ned. SSB har ført statistikk over mengda igangsetjingsløyve til fritidsbustader sidan 2010. Tala for fjoråret er det lågaste i statistikken deira. Her var koronaåret 2021 på topp der ekstra mange fekk løyve til hyttebygging.

SSB påpeikar at igangsetjingsløyve ikkje er det same som at bygg blir ferdigstilte. 946 av dei 6508 fritidsbustadene som fekk igangsetjingsløyve i 2021, er enno ikkje ferdigstilte.