NPK-NTB: Frp-leiar Sylvi Listhaug meiner det ikkje er noko å feire at utsleppa i industri og landbruk går nedover. Ho kallar politikken for «sjølvskading».

Førebelse tal frå SSB viser at utsleppa av klimagassar i Noreg gjekk ned med 4,7 prosent i 2023. Men at industrien stod for mesteparten av kutta, meiner Listhaug først og fremst er eit faresignal.

– Det er spesielt å sjå at ein statsråd frå Arbeidarpartiet står på TV og jublar over at norsk industriproduksjon har vorte redusert som følgje av høge straumprisar, seier Listhaug til Nationen.

Ho viser til eit innslag i Dagsrevyen der klima- og miljøminister Andreas Bjelland Eriksen (Ap) omtalar kutta som «gledelege».

I landbruket gjekk klimautsleppa ned med 3,9 prosent frå 2022. Årsaka er færre amme- og mjølkekyr. I olje- og gassektoren går utsleppa også ned – mellom anna på grunn av elektrifisering av sokkelen. Listhaug omtaler det som kontraproduktivt:

– Det er heilt feil medisin. Det er sjølvskading på høgt nivå. Det er eit av dei verste symbola på symbolsk klimapolitikk.

Ho peikar på at olje- og gassnæringa er kvotepliktig og at dei allereie kuttar utsleppa gjennom kjøp av kvotar.

– Då er det meiningslaust å elektrifisere plattformer med kraft frå land som flyttar utsleppa, og som aukar straumrekninga for folk og bedrifter. Krafta burde heller vorte brukt til industriutvikling, seier Listhaug.