LO og YS samde med staten

(NPK-NTB): LO og YS er samde med staten og unngår dermed streik etter å ha mekla gjennom natta.

Det opplyser LO og YS i ei pressemelding fredag morgon.

– Vi har fått gjennomslag for viktige element frå krava våre. Lønnsramma enda på 5,2 prosent, som skal fordelast mellom eit sentralt tillegg på 25 prosent og eit lokalt tillegg på 75 prosent, seier YS Stat-leiar Jens B. Jahren til Parat.

Forhandlingsleiaren frå LO, Egil André Aas, seier dette har vore det vanskelegaste oppgjeret i hans tid som LO Stat-leiar.

– Vi måtte ta nokre tunge val, men tilbakemeldingane frå medlemmer og tillitsvalde før dette oppgjeret har vore at det viktigaste er å komme tilbake til likelydande tariffavtalar, der forhandlingar skjer i same rom, og alle statstilsette blir varetekne, seier han.

LO Stat hadde i forkant varsla at dei ville ta ut totalt 4200 tilsette dersom det vart streik. I første omgang ville 1097 tilsette i Oslo bli tekne ut, mellom anna tilsette ved Universitetet i Oslo og Oslomet.