Lokalaviser slit med rekrutteringa

(NPK-NTB): Aviser i distrikta slit med å rekruttere nye journalistar. Fleire av dei fryktar å bli liggjande bakpå digitalt og at dei ikkje klarer å levere ønskja innhald.

Ei undersøking av 21 lokalaviser frå 2023 viser at redaktørar synest det er så vanskeleg å rekruttere nye journalistar at dei må hanke inn folk utan journalistisk utdanning, seier medieforskar Birgit Røe Mathisen ved Nord universitet til Klassekampen.

– I studien såg vi også eit paradoksalt sprik mellom oppfatninga til studentane om kva det vil seie å jobbe i lokalavis og kva oppgåver redaktørane i lokalmedia treng dei til, seier Mathisen.

Den siste veka har det gått ein debatt i Medier24 som handlar om korleis ein skal angripe utfordringa. Den ansvarlege redaktøren i bransjeavisa Erik Waatland skreiv i eit meiningsinnlegg sist veke at journalistar i hovudstaden på leit etter jobb bør «leggje bort kaffi latten og søkje jobb utanfor ring 3».

Generalsekretær Tomas Bruvik i Landslaget for lokalaviser (LLA) seier det støtt og stadig er gode moglegheiter for å få seg ei fast stilling utanfor dei store byane.

– Som regel er det langt oftare kunngjort faste stillingar enn vikariat i lokalavisene utanfor storbyane, seier han.

(©NPK)