Mange fiskefartøy skuldar CO2-avgift

(NPK-NTB): Ein kontroll av fiskefartøy som har bunkra drivstoff i Noreg, har avslørt at 159 fartøy frå inn- og utland skuldar staten grunnavgift og CO2-avgift.

Seniorskattejurist Hanne Cecilie Førland opplyser til NRK at 115 reiarlag har fått varsel om å betale til saman 286 millionar kroner i grunnavgift og CO2-avgift, fordelt på 159 fartøy. Det er til no innbetalt rundt 90 millionar kroner, ifølgje Skatteetaten. Ikkje alle vedtaka er sende ut enno.

Fartøy som bunkrar drivstoff i Noreg, skal både betale grunnavgift og CO2-avgift. Avgiftene treng ikkje betalast for fartøy i utanriksfart eller på fiske i fjerne farvatn.

Skatteetaten har gjennomført kontroll av bunkringar i Noreg for perioden 1. februar 2021 til 28. februar 2022. Der kom det fram at mange norske og utanlandske fiskefartøy ikkje hadde betalt avgifter i tråd med regelverket.

Ifølgje Fiskebåt, organisasjonen til havfiskeflåten, gjaldt mange krav grunnavgift som fiskeflåten uansett ville fått refundert. Det var også omtrent 30 norske fartøy som fekk varsel om å betale CO2-avgift.

– Ein del saker gjaldt fartøy som hadde planlagt fiske i fjerne farvatn, men av ulike årsaker også fiska i nære farvatn på den aktuelle turen, seier assisterande direktør Jan Ivar Maråk i Fiskebåt.

(©NPK)