Mange utsette for ID-tjuveri

Dei siste to åra har meir enn 100.000 nordmenn opplevde ID-tjuveri, viser ei undersøking. Folk mellom 45 og 59 år og dei under 30 år er mest utsette.

Undersøkinga er utført av Respons Analyse på vegner av Skatteetaten og Norsk senter for informasjonssikring (NorSIS). Den viser at 3,6 prosent av dei spurde opplyser å ha fått misbrukt identiteten sin dei to siste åra.

– Framleis opplever altfor mange å få ID-en sin misbrukt, og det må vi gjere noko med, seier Marianne Henriksen, fagdirektør for ID-forvaltninga i Skatteetaten.

Dei fleste tilfella av ID-tjuveri skjer i samband med netthandel. I nær halvparten, 47 prosent, av tilfella har det skjedd ved at nokon har kjøpt ei vare i deira namn på internett.

I tillegg opplyser 22 prosent at identiteten deira har vorte misbrukt ved kjøp av ei teneste eller abonnement på internett.

– Samtidig er det godt å sjå at ID-misbruket ikkje har skote i vêret sjølv om året vi har lagt bak oss har vore prega av korona og langt meir netthandling enn tidlegare, seier Henriksen.

Seniorrådgivar Eivind Reiner-Holm i NorSIS meiner bruk av BankID eller andre totrinnpåloggingar er årsaka til at ikkje fleire blir svindla. I tillegg har folk flest vorte meir klar over å ikkje dele personopplysningar ukritisk, påpeikar han.