MDG forlèt lakseskatt-forhandlingane

NPK-NTB: MDG forlèt forhandlingane om grunnrenteskatt for havbruksnæringa, den såkalla lakseskatten. Dei andre partia forhandlar vidare om eit forlik.

– Dette er ei tapt moglegheit for å løyse dei store miljøa og dyrevelferdsproblema i havbruksnæringa i dag, derfor går vi i dag frå forhandlingane, seier MDG-nestleiar og stortingsrepresentant Lan Marie Berg til NTB.

Klokka 14 møttest partia til eit nytt forhandlingsmøte om saka på Stortinget. Berg informerte då om at MDG ikkje vil vere med vidare.

Regjeringa har sagt at dei ønskjer eit breitt forlik på Stortinget om saka, men frå før av har også Frp forlate forhandlingane.

– I utgangspunktet er vi veldig positive til innføring av grunnrenteskatt, men har heile tida vore opptekne av at han må kombinerast med ei miljøavgift. Vi ville erstatte produksjonsavgifta med ei kraftig miljøavgift, og som konsekvens av det også gjere litt fleire justeringar mellom anna i fordelinga mellom stat og kommune. Det ligg ikkje på bordet, seier Berg.

Ho meiner at høgre- og venstresida har gjort diskusjonen om lakseskatt til eit spørsmål om skatten bør vere høgare eller lågare enn det regjeringa har lagt fram.

– Vi meiner grunnspørsmålet regjeringa og dei andre partia burde stilt seg er kva slags havbruksnæring vi ønskjer oss i framtida, seier ho.

– I 20 år har næringa lova å stoppe problema med lus, rømming og utslepp utan at dei har gjort det. No burde vore tidspunktet å ta tak i det. Det vesle på miljø som har vore diskutert og er for dårleg, vagt og ikkje kravfullt nok til å løyse problema.