Mykje mikroplast langs kysten

(NPK): Ei ny undersøking viser alarmerande funn av mikroplast i smådyr langs norskekysten og i havet utanfor. Også havbotnen har eit høgt innhald av mikroplast. Eit funn i Oslofjorden viser inntil 10 gonger meir mikroplast enn ute i havet.

DNV har samla inn prøver langs store delar av norskekysten, medan NGI har analysert mikroplasten og samanlikna nivåa. Resultata i undersøkinga som er den første av sitt slag i Noreg, viser betydeleg høgare konsentrasjonar i kystnære område samanlikna med havet.

På norske strender er det meste av plasten emballasje og forbrukarartiklar, som plastposar og drikkeflasker, og dessutan materiale frå havbruksnæringa, som garn og tau.

I Noreg kastar kvar enkelt av oss i snitt over 100 kilo plast i året.

På verdsbasis blir det nesten produsert 370 millionar tonn plast i året. Sjølv om plastproduksjonen gjekk ned under koronapandemien, viser prognosane ein stadig vekst i produksjonen framover.

Mikroplast i havet stammar særleg frå maritim verksemd, som akvakultur, shipping, kloakkreinseanlegg og diverse utslepp langs kysten. Kor mykje plast som hamnar i næringskjeda i form av mikroplast, er eit viktig men relativt uutforska tema.

(©NPK)