Nedgang på hyttemarknaden

(NPK-NTB): Det er mykje mindre aktivitet på den norske hyttemarknaden som følgje av auka levekostnader og fleire rentehevingar, ifølgje DNB Eiendom.

– Kjøparane no er meir selektive og har god tid. Vi har mista «koronakjøparane» og mange sit på gjerdet på grunn av trongare økonomi, seier leiar for hyttesegmentet i DNB Eiendom, Tone C. Krange.

Ho viser til at fleire rentehevingar og auka kostnader i samfunnet har pressa økonomien til hushalda. Ikkje minst som følgje av auka straumutgifter, fordi hytteeigarar ikkje får kompensert straumen på same måte som for fast bustad.

– Akkurat no er det få på visning, noko som er heilt normalt for årstida, men vi ser også ein klar tendens til at temperaturen i hyttemarknaden har gått ned, seier ho.

I 2022 vart 26 prosent færre tinglyste hytter og 2.570 færre brukte hytter selt gjennom meklar. Prisane har inntil no halde seg relativt høgt, men til liks med bustadmarknaden ser DNB no ei endring.

Den siste månaden vart 74 prosent av hyttene i Noreg selt under foreslått pris, samanlikna med 58 prosent i fjor.

(©NPK)