Neppe straumrasjonering i vinter

Overingeniør Lars Eirik Eilifsen i energi- og konsesjonsavdelinga i NVE trur ikkje det blir aktuelt med rasjonering av straum til vinteren.

– Om det skulle bli behov for rasjonering, er det ikkje mest sannsynleg at det vil skje når forbruket er på sitt høgaste, men heller om våren. Det er om våren vassmagasina er på sitt lågaste, samstundes som snøsmeltinga er rett rundt hjørnet, seier Eilifsen til bransjenettstaden Europower.

For at Noreg skal kome i ein situasjon der det er aktuelt å rasjonere på straumen, må det anten oppstår omfattande og langvarige utfordringar i nettet, eller det må vere mangel på vatn. Det er gjerne ein kombinasjon av liten vatn og utilgjengeleg importkapasitet som blir treke fram som eksempel.

– Ein må ha nok i magasina til vinteren, uavhengig av om vi importerer straum eller ikkje. Vi klarer ikkje å dekkje forbruket berre med import. Det er derfor vi i NVE har vore så tydelege overfor kraftprodusentane i Sør-Noreg at dei må halde tilbake vatn, og slik bidra til at vi ikkje kjem i ein situasjon med rasjonering, seier Eilifsen.

Vassmagasina på Sør- og Austlandet har no rekordlåg vasstand. Overingeniøren meiner at veke 40 kan gi oss mange svar. Det er første veka i oktober, der omtrent halve landet har haustferie.

– Utover hausten har vi eit mykje betre bilete. Då er det færre veker igjen der nedbøren kan variere veldig mykje, og meir av nedbøren blir liggjande som snø. Faren for flaum er mindre. Til nærmare vi kjem vinteren, til sikrare er vi på kor mykje vatn ein treng, meiner Lars Eirik Eilifsen.