Netthandelen auka i 2025

(NPK-NTB): Nordmenn handlar stadig meir på nett, og netthandelen auka gjennom fjoråret. Fylka på Austlandet står for den største veksten.

Samla for heile Noreg auka netthandelen med 5,2 prosent frå 2024.

I Akershus auka netthandelen aller mest i fjor, med 8,4 prosent, viser tal frå Posten Bring. Deretter følgjer Østfold (8,0 prosent) og Vestfold (7,2 prosent).

– 2025 var eit hektisk, men svært godt år for netthandelen i Noreg. I fjerde kvartal, med Black Friday og julehandelen, auka pakkevolumet med 16,6 prosent samanlikna med fjoråret, seier konserndirektør for e-handel og logistikk, Thomas Støkken i Posten Bring.

Dei forventar framleis vekst i netthandelen i 2026.

I Nord-Noreg har veksten vore lågare, men det er to kommunar i Nordland som toppar lista over flest pakkar per innbyggjar – Røst og Rødøy.

– Så netthandelen er svært viktig i distrikta, seier Støkken.

I resten av fylka var veksten som følgjer:

Møre og Romsdal 6,5 prosent, Rogaland 6,0 prosent, Telemark 5,5 prosent, Buskerud 5,1 prosent, Oslo 5,0 prosent, Agder 4,9 prosent, Innlandet 4,6 prosent, Trøndelag 4,2 prosent, Troms 4,1 prosent, Vestland 3,6 prosent, Finnmark 1,3 prosent, Nordland 0,6 prosent.

På Svalbard var det ein nedgang på 11,0 prosent.

(©NPK)