NHO: Meir pessimisme

NPK-NTB: NHOs medlemsundersøking for juni viser at framtidstrua i næringslivet held fram med å bli svekt, samtidig som mange bedrifter har måtta utsetje investeringar.

23 prosent av bedriftene oppgir at marknadssituasjonen i dag er god, medan 21 prosent seier han er dårleg.

Men berre 13 prosent trur situasjonen vil betre seg dei neste seks månadene, medan 20 prosent ventar ei forverring.

– Verda har vorte meir usikker, og det fargar medlemsbedriftene. Spesielt er framtidstrua til sjømatbedriftene mykje svekt på tre månader, heiter det i oppsummeringa.

Undersøkinga viser at tilgang på finansiering ikkje er hovudutfordringa: Berre 7 prosent oppgir dette som ei «stor utfordring». Likevel svarer 23 prosent at dei har måtta avlyse eller utsetje investeringar som følgje av manglande finansiering.

– Dei viktigaste hindera er kostnader og risikovurderingane til långivar. Desse heng saman. Jo meir risiko i eit prosjekt, jo dyrare finansiering, eller krav til tryggleik, står det i rapporten.

På spørsmål om kva finansieringskjelde som har vore viktigast dei siste fem åra, svarer heile 52 prosent opptent eigenkapital. Dette reflekterer ifølgje undersøkinga at mange bedrifter er små og har usikre investeringsprosjekt.

NHOs medlemsundersøking er teken opp mellom 26. mai og 4. juni og oppsummeringa er basert på 1940 svar.