No kan det verte enklare å starte bedrifter i Noreg

Dette skal skje gjennom eit privat-offentleg samarbeid som skal gjere heile prosessen heildigital.

– Å gjere kvardagen enklare for næringsdrivande er høgt prioritert i regjeringa. Forenkling og digitalisering sparer ressursar og gir konkurransefortrinn for norsk næringsliv. Den digitale selskapsetableringa gjer at næringsdrivande kan bruke tida si på verdiskaping heller enn å bale med papir, seier næringsminister Jan Christian Vestre (Ap) i ei pressemelding.

Her heiter det vidare at tenesta «Digital selskapsetablering» har kome på plass etter eit innovativt samarbeid mellom offentleg sektor og finansnæringa, med Sparebank 1 i spissen. Det blir enklare for brukarane å registrere bedrifta si i nettbanken, heller enn å måtte gå inn hos Brønnøysundregistera.

– Digital selskapsetablering er eitt av fleire etableringsprosjekt vi jobbar med. Regjeringa vil redusere kostnadene og byrdene til næringslivet med 11 milliardar kroner. Det er eit ambisiøst mål, og vi jobbar på for å kome i mål innan 2025, seier Vestre.