Norwegian plukkar opp restane av Flyr

(NPK-NTB): Etter at flyselskapet Flyr gjekk konkurs, har Norwegian henta både fly, reservedelar og tilsette frå den tidlegare konkurrenten.

Rundt 100 tilsette og seks fly som tidlegare flaug under Flyr-logoen, er henta inn til Norwegian, skriv Dagens Næringsliv.

Seks Boeing 737 Max-fly som tidlegare var leasa av Flyr, er no i drift under Norwegians paraply. Flya blir leigde i elleve år med ein fast pris og på same vilkår som Flyr hadde.

– Vi fekk desse flya på veldig, veldig attraktive vilkår, og treng ikkje å betale for vedlikehald før flya skal på verkstad, seier Norwegian-sjef Geir Karlsen til avisa.

Under bubehandlinga av Flyr-konkursen i Oslo tingrett torsdag, kom det også fram at Norwegian har plukka opp reservedelar og utstyr på Oslo lufthamn for rundt 5 millionar kroner, ifølgje bustyraren.

I tillegg har meir enn 100 pilotar og kabintilsette så langt fått på seg Norwegian-uniform. 40 kabintilsette var på kurs sist veke, og 40 nye denne veka. Karlsen opplyser at dei fekk dei første førespurnadene om ledige stillingar allereie då Flyr gjennomførte permitteringar i fjor haust.

Også SAS har teke imot tidlegare Flyr-tilsette. Flyselskapet opplyser at 72 tidlegare Flyr-kabintilsette så langt har fått tilbod om jobb i SAS.

(©NPK)