Opprettar ny Økokrim-eining

NPK-NTB: Regjeringa opprettar ei ny eining i Finanstilsynet på Hamar med opp mot 20 tilsette. Målet er å ta folk som hjelper kriminelle med det økonomiske.

– Denne eininga skal sjå etter tilretteleggjaren. Typisk rekneskapsføraren som kan stå fram som ei ordentleg verksemd, men som eigentleg bidreg til å kvitvaske pengar og leggje til rette for kriminell verksemd, seier finansminister Trygve Slagsvold Vedum (Sp) til NTB.

Den nasjonale eininga skal jobbe tett saman med Økokrim.

– Målet er å ta mykje meir av pengane rundt det kriminelle. Det er berekna at eininga skal ha opp til cirka 20 tilsette som skal ha det som hovudjobben sin, seier Vedum.

Han peikar på den danske TV-serien «Den sorte svane» for å forklare kva eininga skal jobbe med.

– Alle som såg den TV-serien, fekk sjå den typen profesjonelle tilretteleggjarar, som går i fin dress, og går på jobb og er litt med i det beste selskap. Men det dei eigentleg gjer, er å hjelpe kriminelle til å gjennomføre den økonomiske verksemda si, seier han.