– Vi ønskjer å leggje til rette for ei endå sterkare satsing på fiskerijournalistikk. Kyst og Fjord har på få år fått ein veldig sterk posisjon i fiskerimiljøet, ikkje minst blant nordnorske kystfiskarar. Med ein stabil og kunnskapsrik stab som nyt stor tillit i næringa, har vi stor tru på ei god utvikling også vidare. Frå før har vi mange sterke mediehus langs store delar av kysten, og Kyst og Fjord passar veldig godt inn i dette biletet, seier administrerande direktør Harald H. Rise i Polaris Media Nord-Noreg i ei sak på nettsidene til Kyst og Fjord.

Kyst og Fjord blei etablert i 2011 med nettutgåve og ei vekevis papiravis. Frå 2019 vart det innført betaling for innhald på nett, og opplaget har stige til rundt 2500. Det er ein tredel av det hovudkonkurrenten Fiskeribladet har.

Det er Øystein Ingilæ (44,7 %) som saman med dei tre andre eigarane; Trond Antonsen (38 %), Daniel Arnrup-Øien (11,7 %) og Hugo Mortensen (5,6 %), som no sel Kyst og Fjord. Oppstarten for 11 år sidan var i Kjøllefjord, som framleis er hovudkontor for selskapet, men dei ni medarbeidarane er også spreidde på ei rekkje ulike stader, som Sortland, Tromsø, Lakselv og Narvik.

Kyst og Fjord blir ein del av Polaris Media Nord-Noreg (PMNN), som etter dei siste oppkjøpa består av 12 mediehus i tillegg til marknadsføringsselskapet iNord og tre minoritetspostar i andre mediehus.