Prisane litt ned i mai

Prisfall på mellom anna møblar og innreiing bidrog til at konsumprisindeksen fall med 0,1 prosent i mai.

Frå mai 2020 til mai 2021 auka likevel konsumprisindeksen med 2,7 prosent, skriv Statistisk sentralbyrå (SSB).

Kjerneinflasjonen, KPI-JAE, steig med 1,5 prosent i same periode.

SSB skriv at også matvareprisane bidrog til nedgangen på 0,1 prosent i prisane frå april til mai. Særleg matvarer som sjokoladeprodukt, meierivarer og spekemat viste nedgang i perioden, og samla sett sokk matvareprisane med 0,6 prosent.

I tillegg vart bøker vesentleg billigare, noko SSB set i samanheng med bokavtalen som frå 1. mai stiller fristiller fjorårets utgivingar frå ein fastpris.

I motsett retning bidrog særleg straumprisane, der det vart målt ein prisoppgang på elektrisitet inkludert nettleige på 4,6 prosent. Prisane på klede og sko bidrog òg til å dempe nedgangen i konsumprisindeksen.