Prisveksten dempar seg

(NPK-NTB): Konsumprisindeksen har auka med 5,4 prosent sidan juli i fjor, ifølgje SSB. Prisane på mat og straum bidreg til å trekkje veksttakten ned frå førre månad.

Inflasjonstala for juli er lågare enn det Noregs Bank og analytikarar på førehand hadde venta.

Konsumprisindeksen steig 0,4 prosent frå juni til juli i år, og var i juli 5,4 prosent høgare enn for eitt år sidan. Dette er 1,0 prosentpoeng lågare enn tolvmånadersveksten som vart målt i juni, ifølgje tal frå Statistisk sentralbyrå.

– Matvareprisane hadde ei historisk høg månadsendring frå juni til juli i fjor. Vi har ikkje målt ein tilsvarande høg vekst i prisane frå juni til juli i år, noko som gjer at tolvmånadersveksten for matvareprisane fell i juli, seier seksjonssjef Espen Kristiansen i SSB.

– Same effekt ser vi for straumprisane. Dei fall ein del meir frå juni til juli i år samanlikna med same periode i fjor. Dette trekkjer tolvmånadersveksten nedover, legg han til.

Framleis høge matvareprisar
Frå juli i fjor til juli i år steig matvareprisane med 9,2 prosent. Dermed steig matvareprisane med 3,2 prosent frå juni til juli i år.

Det har vore fleire månader på rad med auka prisar på matvarer. Frå juni i fjor til juni i år var stigninga på heile 13,7 prosent.

– Oppgangen i matvareprisane frå juni til juli kan sjåast i samanheng med dei årlege forhandlingane mellom butikkjeder og leverandørar. I tillegg blir effektane fasa frå jordbruksoppgjeret inn i juli, seier Kristiansen.

I juli var det spesielt auka prisar på kjøtt, mjølk og ost som trekte opp indeksen.

Lågare straum- og drivstoffprisar
Blant varene som dempar tolvmånadersveksten i juli finn vi bensin, diesel og straum. Frå juli 2022 til juli 2023 fall prisane på bensin og diesel med høvesvis 15,2 prosent og 21,0 prosent.

Prisane for elektrisitet inkludert nettleige var 4,3 prosent lågare i juli i år samanlikna med i fjor.

Det har vore store forskjellar i straumprisane sidan hausten 2021. Juli i år var den første månaden sidan straumstøtteordninga vart innført der ingen av prisområda landa er delt inn i hadde høg nok marknadspris til å kvalifisere for straumstøtte, skriv SSB.

(©NPK)