Prisveksten steig til 7 prosent i januar

(NPK-NTB): Prisveksten i Noreg steig til 7 prosent i januar, noko som er litt meir enn analytikarane venta.

Det er den årlege prisveksten frå januar 2022 til januar 2023 som er på 7 prosent. Det var venta at han ville liggje på cirka 6,5 prosent.

– Dei viktigaste årsakene til den høge prisveksten er framleis utviklinga i straum- og matvareprisane. I januar i år auka også prisane på bilar mykje som følgje av ei avgiftsendring, seier seksjonssjef Espen Kristiansen i SSB.

I desember var tolvmånadersveksten i KPI på 5,9 prosent. Utviklinga i straumprisane er den viktigaste årsaka til at ho i januar auka til 7 prosent.

Auken skjer sjølv om prisane på elektrisitet inkludert nettleige fall med 10 prosent frå desember 2022 til januar 2023. Likevel var straumprisane 15,4 prosent høgare i januar 2023 enn i januar 2022.

– Sjølv om straumprisane fall mykje frå desember til januar, fall dei meir i same periode eitt år tidlegare, hovudsakleg fordi straumstøtta vart utvida på den tida i fjor. Dette gjer at tolvmånadersveksten for straumprisane i januar auka frå desember, seier Kristiansen.