Rekordinntekt for Sykkylven-bedrift

Straumsheim Glass og Fasade sette ny omsetningsrekord i fjor, ifølgje lokalavisa Nyss.

Sykkylven-bedrifta omsette for 69 millionar kroner i 2023, og hadde ein ordrereserve på kring 36 millionar kroner, fortel dagleg leiar Ole Straumsheim til avisa. Det betyr at dei framleis har mykje å gjere framover.

Bedrifta som blei starta opp i 1968, er mellom dei største fasadeentreprenørane i regionen og lagar vindauge, dører og fasadar i aluminium og stål. Tilpassing og forming blir gjort ved fabrikken i Straumgjerde. Dei har også opna avdeling i Spjelkavik i Ålesund, med to tilsette.