NPK-NTB: Slakteria i landet opplever ein ny botnrekord i talet på sauer og lam som er levert inn til slakt i år. Talet er det lågaste på minst 27 år.

Slaktinga har ikkje vore lågare sidan innføringa av dagens klassifiseringssystem i 1996, skriv Nationen.

Fram til og med 12. november har slakteria betalt ut slakteoppgjer for til saman litt over 1 million sauer og lam.

Nedgangen er på over 50.000 sauer og lam, nesten 5 prosent, samanlikna med same tid i fjor.

Som forklaring på nedgangen blir mellom anna nemnd at det er stadig fleire bønder som vel å avslutte sauehald, dårlege beiteforhold i år og at fleire vel å utsetje slaktinga av lam til mars neste år, som er siste teljemånad for å få utbetalt tilskot, skriv avisa.