Rekordverdi på eksport av sjømat i oktober

(NPK-NTB): I Noreg vart det eksportert sjømat for 18,5 milliardar kroner i oktober. Det er ein auke på 914 millionar kroner samanlikna med same månad i fjor.

Auken svarer til 5 prosent, opplyser Noregs sjømatråd i ei pressemelding.

Aldri før har det vorte eksportert sjømat for ein høgare verdi i ein enkeltmånad. Den førre eksportrekorden i ein enkeltmånad stammar frå oktober 2023.

– Årsaka er først og fremst ein eksepsjonelt sterk makrelleksport som vi ikkje har sett maken til. Den står åleine for nesten heile verdiveksten i oktober, seier administrerande direktør i Noregs sjømatråd, Christian Chramer.

Det vart eksportert norsk makrell for 2,5 milliardar kroner i oktober, som er ein auke på 750 millionar kroner samanlikna med same månad i fjor.

Auka etterspurnad i Asia er hovudårsaka til makrellveksten. Det har ført til både auka konkurranse og høgare prisar.

Vidare er det også vekst for mellom anna laks, aure og torsk. Spesielt laks held fram med å gå bra. Det vart eksportert norsk laks til ein verdi av 12 milliardar norske kroner. Det er ein vekst på 1 prosent og ny toppnotering i eksportverdi for laks.

Polen, USA og Nederland er dei største marknadene for norsk sjømateksport.

Utsikter til auka kjøpekraft både i EU, USA og andre marknader er blant faktorane som speler inn på ei positiv utvikling for norsk sjømat. Så langt i år har Noreg eksportert sjømat for 143,1 milliardar kroner, som er ein liten auke frå i fjor.

(©NPK)