Restaurantar dannar eige forbund

(1NPK-NTB): Drivarane av fleire titals restaurantar har etablert organisasjonen Norsk Restaurantforening. Dei meiner NHO ikkje forstår problema til små verksemder godt nok.

Initiativtakar og styremedlem i den nye foreininga, Ove André Jakobsen, seier til NRK at ambisjonen er å vekse, bli ei tydeleg stemme for restaurant- og serveringsbransjen og forbetre omdømmet i bransjen.

– Vi ønskjer å skape ei ny kraft som skal hjelpe små og mellomstore bedrifter innan restaurantbransjen til å komme seg vidare etter korona, seier han.

Fleire av restaurantdrivarane i den nye foreininga har tidlegare vore med i NHO. Jakobsen meiner NHO har gjort mykje bra, men at dei ikkje har klart godt nok å setje seg inn i utfordringane på golvet.

NHO er ikkje samd i kritikken. Kommunikasjonsdirektør Merete Habberstad i NHO Reiseliv seier at dei har vore i tett kontakt med medlemsbedriftene og halde styresmaktene oppdaterte om korleis koronarestriksjonane har ramma bransjen gjennom heile krisa.

Likevel forstår ho restaurantdrivarane er utolmodige etter ein lang periode med unntakstilstand.

– Vi ha god dialog med stiftarane av Norsk Restaurantforening. Det er forståeleg at frustrasjonen er stor blant bedrifter som har vore hardast ramma av alle, seier Habberstad til kanalen.

(©NPK)