Rolls-Royce vil byggje kjernekraftverk

(NPK-NTB): Britiske Rolls-Royce har eit mål om å byggje 200 små kjernekraftverk innan 2050. Nokre av desse trur selskapet at vil liggje i Noreg.

– Vi innser at det er ein lang veg fram, at mykje arbeid må gjerast, men vi ser på Noreg som ein marknad som verkeleg kan blomstre, seier sjef for Rolls-Royces kjernekraftsatsing Tuomo Huttunen til E24.

Avisa møtte Huttunen måndag, då han var i Oslo for å signere ein intensjonsavtale med Norsk Kjernekraft. Dette selskapet er eigd av milliardær Trond Mohn, Christian Rieber og Jakob Hatteland.

Målet er å byggje små, modulære reaktorar (SMR) i Noreg, skriv avisa.

Modulane til kjernekraftverket skal produserast i Rolls-Royces eigne fabrikkar. Deretter vil dei bli frakta dit kjernekraftverket skal liggje og sett saman.

Så langt er det ingen selskap som har bygd ein SMR som er i drift. Rolls-Royce har som mål å ha sin første SMR i drift i Storbritannia i 2031.

(©NPK)